早兩日阿史介紹過昔日香港嘅販毒問題，其實香港嘅毒品問題可以追溯到清代，英國通過不平等條約搵咗香港亦係毒品鴉片貿易所致。講到呢段歷史，自然要講講林則徐响虎門銷煙。

十八世紀開始，英國東印度公司開始大量對華輸出大量鴉片，雖然清廷有意打擊，但屢禁不止，唔單止導致白銀外流，仲導致國民健康出現嚴重問題。當時就有官員向皇帝上書，要求禁煙。响1838年，鴻臚寺卿黃爵滋上書要求禁煙，時任湖廣總督林則徐表示支持，後嚟林則徐獲任命為欽差大臣，仲去咗廣州禁煙。

點解係去廣州呢？因為當時廣州係中國唯一對外通商港口，外國對華貿易由十三行壟斷，鴉片貿易自然要經佢哋手。林則徐就要求佢哋叫啲外國商人交晒啲鴉片出嚟，仲查封煙館，逮捕煙販，雷厲風行。就算英國駐華商務總監義律幾唔願意，最後都係交晒啲貨出嚟。

咁大批貨，自然要諗辦法毁滅啦！本來林則徐想運啲鴉片返北京銷毁，但御史鄧瀛就認為咁遠運過去有可能會俾人掉包，所以建議响廣東銷毀就算，道光帝同意呢個建議，於是林則徐就响虎門銷煙。但問題又嚟喇！最初林則徐用傳統銷毀鴉片「煙土拌桐油焚毀法」，但鴉片會滲入地中，吸毒者掘地取土仍然會得當中十之二三。於是林則徐用另一種方法「海水浸化法」，即先由溝道引水入池，撒鹽成鹵，然後拋入切開嘅煙土泡浸，再落石灰，鴉片頓成渣沫。等到海水退潮時，啟放涵洞，鴉片就隨浪入海。據《三朝籌辦夷務始末》記載，有現場參觀嘅外國商人向林則徐「摘帽斂手」，以示敬意。

呢次銷煙就成為中國歷史其中一件重大事件，虎門呢個地方亦廣為人識。