只要係香港人，相信都對東莞好熟悉。既然叫得做阿史，點都要講吓歷史嘢，東莞除咗多工廠，仲有猛將出現過，佢就係明朝嘅袁崇煥。上年套《超時空男臣》，翠如bb個男朋友——蕭正楠都飾演過袁崇煥，不過係科幻加穿越版。

《明史》入面記載，袁崇煥係東莞人，萬曆四十七年中進士，入仕後响兵部做官，後來成為明末鎮守邊關嘅抗金（後金）名將。他曾經打過寧遠之戰、寧錦之戰等著名戰役，兩場戰役入面分別戰勝努爾哈赤及皇太極。不過，明思宗中了皇太極嘅反間計，最終袁崇煥被凌遲處死。

其實東莞原本係魚米之鄉，盛產稻米。到近現代，中國1980年代初實行改革開放，東莞成為廣東珠三角崛起的中小城市，係「廣東四小虎」之一。由於當時生產成本低，加上各種優惠政策，吸引入不少港商到東莞投資。

除咗港商外，台商對東莞工業發展亦都有重大作用。到80年代尾，台灣當局解嚴，放寬兩岸民眾交流，珠三角就成為台商開廠的落戶之地。上世紀90年代，東莞成為國內其中一個工業重鎮，興旺嘅製造業更令東莞贏得「世界工廠」稱號。

但隨住製造業成本不斷上漲，近年本來响東莞設廠嘅商人及企業紛紛外遷，撤廠潮令昔日熱鬧嘅工廠區變得冷清，「世界工廠」光輝不再。