上次講到利瑪竇落腳澳門，有史友提起《坤輿萬國全圖》，一於帶大家繼續出發，探討吓依位文化交流使者嘅足跡同貢獻。

利瑪竇1583年成功入廣東肇慶傳教，獲兩廣總督批准興建教堂，一住就係6年。佢响西方帶嚟大批物品，包括聖母像、地圖、星盤、三棱鏡等等，仲有歐幾里得《幾何原本》，令人眼界大開。

利瑪竇當時响肇慶打造中國第一座天主教教堂、歐洲建築風格嘅仙花寺，並開始傳教。為免被驅逐，佢同其他傳教士一開始比較低調，聲稱來自天竺，又著佛教僧侶服飾，搞到中國人以為佢哋係佛教徒。

利瑪竇諗法多多，佢從澳門搵製鐘嘅工匠，聯同肇慶嘅五金工匠，齊齊响仙花寺整出中國第一座機械自鳴鐘。不過，要數利瑪竇最出名嘅，莫過於响萬曆年間繪製《山海輿地圖》，以及後來嘅《坤輿萬國全圖》，佢繪製嘅世界地圖打破中國傳統「天圓地方」嘅概念，為中國人介紹中國近代地理學知識。

當時嘅世界地圖將地球分成西半球和東半球展現在平面上，地處遠東的中國响地圖最東面的邊緣地帶，士大夫對天朝「中央之國」僻處地球一隅而沮喪。精明嘅利瑪竇察覺到之後，立即改變設計，將子午線從地圖的中間向西移動170度，令中國出現响圖中心位置。

雖然响澳門學過中文，但利瑪竇覺得未足夠。佢响肇慶請咗位秀才做中文老師，努力學中國儒家經典，經過一番苦工，佢可以用中文著書立說，所以幾時都話，讀書同埋學多門外語有幾重要。