最近煲電視劇，居然有好耐無見過嘅周海媚。講起佢，又點可以唔提1995年套電視劇《情濃大地》，當時佢出嫁一幕據講就係响特色建築可園內拍攝。靚女加靚景，正！

可園其實位於東莞，係清代廣東四大名園之一，响道光三十年（1850年）建成，目前係全國重點文物保護單位。可園建築講究，亭台樓閣、上水橋榭、精緻窗雕等一應俱全。除咗係電視劇取景地，可園仲有濃厚文化氣息。名畫家居巢及居廉曾响可園畫畫十年，傳播沒骨、沒水、撞粉花鳥畫法，開創嶺南畫派先河。

可園入面有間「草草草堂」，並唔係阿史打多咗字，而係有典故嘅，根據《草草草堂序》記載：「偶爾饑，草草具膳；偶爾倦，草草成寐；晨而起，草草盥洗。洗畢，草草就道行之。」即係話肚餓嗰時，草草地食餐飯；覺得攰，就草草地瞓個覺，同埋起身之後草草地梳洗，所以就起咗個「草草草」嘅名，主要係園主張敬修紀念自己嘅戎馬生涯。

「草」得嚟原來一啲都唔hea，仲好認真，阿史甘拜下風，諗諗吓，返工日子都好似上面講嘅一樣，做咩都係草草完成。