上個禮拜阿史介紹過澳門豬扒包，有澳門史友即刻反駁話澳門本地人唔興食豬扒包，仲推介咗阿史去試辣魚包。阿史因為工作關係，又喺週末去咗趟澳門，順路去試埋個辣魚包。

澳門嘅辣魚包有兩種版本，一種係用麵包（通常係用豬仔包，冇錯，又係佢）夾住罐頭嘅原條辣沙甸魚，夠原汁原味，好多老店都係咁整辣魚包。另一種嘅餡料係用咖喱粉加碎魚肉嚟整，呢啲魚肉有啲會用吞拿魚罐頭；有啲又會用鯖魚罐頭；有啲就兩溝；仲有一啲會加埋洋蔥嚟炒。

阿史本身對罐頭食物冇乜興趣，揀咗個咖喱味嘅辣魚包嚟試，麵包烘到脆卜卜，入面嘅咖喱得小小辣，啱香港人嘅口味，洋蔥大大粒，配埋魚肉碎，都幾惹味吓，果然史友冇介紹錯！