最近講開特色建築，一於同各位介紹吓外形別緻嘅鑊耳屋。顧名思義，鑊耳屋兩邊橫牆形狀好似鑊耳，又好似明代官帽嘅兩隻「耳仔」，其實係有「獨佔鰲頭」嘅意思，唔係所有人都有資格用，最早期淨係得有功名嘅鄉村先至有份，加上建築材料有上乘青磚，如果唔係有錢人家或名人，又點用得起，所以住鑊耳屋絕對係身份象徵。佛山黃飛鴻紀念館座建築，正正就有一對鑊耳。

鑊耳屋係嶺南傳統民居代表，增城、佛山等地都可以見到。除咗外形得意，對鑊耳仲有好大功能，可以遮擋陽光直射，減低屋內悶熱感，又可以擋開吹入巷仔嘅大風，令風透過門窗入屋，保持清涼，據講嗰設計仲可阻止火勢蔓延，真係用途多多，勁！