可能好多史友會知肇慶曾經係南明永曆王朝嘅首都，咁肇慶有龍床一啲都唔出奇，奇就奇在張龍床竟然係一塊大石頭。

原本係桂王嘅朱由榔1646年係廣東肇慶稱帝，即永曆帝，但呢個永曆王朝啱啱建立就被清兵壓境，朱由榔退到去廣西，多得廣西巡撫瞿式耜死守，先將清兵擊退，仲收復埋梧州、平樂等地，再同義軍聯合，喺全州大敗清軍。後嚟清將李成棟見形勢大變，自己歸降南明不特止，仲脅逼廣東提督佟養甲歸附，於是乎，永曆王朝兵不血刃咁收復咗廣東全境，迎嚟咗佢最鼎盛嘅時期。可惜好景不長，永曆朝廷入面吳、楚兩黨爭權奪利，互不相容，朱由榔對此束手無策，仲企圖興建歌舞場嚟粉飾太平，呢個歌舞場就起喺七星岩嘅水月宮裏面。永曆朝廷嘅黨派之爭俾咗清兵一個可以各個擊破嘅可乘之機，1649年，戰爭形勢急轉直下，粵北南雄州、韶州相繼失守，廣州告急，肇慶亦都人心惶惶，百姓紛紛逃難。1650年，清兵打到去肇慶，朱由榔逃去七星岩嘅水月宮，就响入面塊大石頭度瞓咗一晚，呢塊石頭於是就被稱為龍床。

朱由榔雖然逃出咗肇慶，但都冇好下場，有機會再講。