阿史公司有個怪同事，平時做乜都唔得，唯一拍馬屁同招呼老闆工夫最出色，劣行多到連成日喺史檔出場嘅秘書小姐都睇唔過眼，要走嚟同阿史投訴。上星期開會，怪同事突然對住老闆話，老闆對佢有「梁園宴雪」之恩；老闆雖然成日返內地，但畢竟唔係文史人，竟然反問怪同事，「梁園」係唔係佛山嗰個喎。阿史聽到，即時眼都凸埋。

到底「梁園宴雪」點解？簡單而言，今日嚟講係有「受恩知遇」嘅意思，呢個咁生僻嘅成語，怪同事點解會識？冇人知道。講返重點，呢個成語中嘅「梁園」，同佛山「梁園」係兩個完全唔同嘅地方，成語中個「梁園」係漢代梁孝王所營建，位於河南省開封，同佛山相距都幾遠。

至於佛山梁園，佢同香港距離就近好多喇。呢座梁園被稱為「嶺南第一園」，亦係「廣東四大名園」之一。阿史早幾年去過，印象中嗰度好靚，睇返資料呢度主要由群星草堂、汾江草廬、十二石齋同寒香館等「建築群」（唔識形容）組成，即係既有住嘅地方，亦有祠堂同園林。

資料又顯示，佛山梁園喺清朝嘉慶年間開始營建，早於1990年已經被定為省級「重點文物保護單位」，省政府繼而喺1994年開始大規模復修；大家有興建都可以去睇睇，不過講明先，梁園係要收入場費嘅，至於票價幾多，真係唔記得喇。

圖片：互聯網