每當提起佛山，史友們第一時間會諗到啲乜呢？可能會係黃飛鴻，可能會係無形腳，又可能係葉問。其實佛山呢個城市有樣嘢係全國馳名，就係陶瓷喇！

早响新石器時代石灣地區已經有人類燒陶嘅遺跡。响秦漢時期，石灣製陶技術已經達到一定水平，去到唐宋時期，石灣製陶可以話係出現第一個黃金時期。當時石灣出現咗大型窯場，就以青釉、醬釉為主。亦受惠於廣州响唐宋時期係一個貿易大港，所以石灣陶瓷成為當時其中一種出口貨品。而石灣製陶另一個製陶黃金時期就係明清時期，明代時嘅石灣陶瓷業成為咗民間陶瓷商品生產嘅集中地，加上石灣陶瓷製造技術日趨成熟，令石灣陶瓷成為上佳嘅藝術品。《明詩綜》有載：「石灣瓦，甲天下」，反映咗當時石灣陶瓷生產嘅地位。

當時由於陶業興盛，呢啲藝術創作好多時有抄襲情況，亦因為咁，佛山石灣嘅陶業行會就响明代嘉靖年間出現，行會會按產品類別、工種類別同地域界限嚟劃分，各自定有行規，行會之間唔可以模仿抄襲，最初只有八行，至清末增至三十多行。行會嘅出現，亦令石灣陶瓷生產逐步進入規範化經營。

大家下次去佛山，不妨去石灣了解一下當地製陶業嘅歷史。