上星期阿史介紹咗佛山係南方陶都，佛山仲另一個外號叫「禪城」，咁係點嚟嘅呢？今次阿史就介紹埋佢。
位於珠三角西部嘅佛山，古稱為季華鄉。相傳三藏法師達毗耶舍响東晉時帶咗兩尊銅像到呢度，仲响塔坡崗上一間茅屋弘法講道，但後嚟達毗耶舍離開咗，茅屋就倒塌消失咗。到咗唐代貞觀年間，季華鄉塔坡崗上空突然異彩四射，當地居民就响塔坡崗發現咗三尊佛像（唔知點解多咗一尊），亦因為咁，當地居民就建寺供奉，所以當地亦有一句「未有佛山，先有塔坡」嘅諺語。啲人認為呢個地方係佛家之山，於是取名「佛山」，亦由於佛山漸漸成為珠江三角洲嘅佛教中心，所以又稱禪城。
不過咁，大家今時今日去到佛山如果搵到塔坡古廟，就同上文提及佛寺無乜關係。因為响明洪武二十四年塔坡寺被拆毀，天啟年間連塔坡崗都被移平，信眾於是就响醫靈鋪萬壽坊重建塔坡寺，亦即係依家嘅經堂古寺。而塔坡古廟相傳係原來塔坡寺嘅舊址，不過呢個古廟就供奉東嶽大帝，唔係佛寺。