最近睇新聞，話中國同印度又爭嘢。爭乜嘢呢？就係孟加拉達卡證券交易所嘅股份。
孟加拉達卡證券交易所成立於1954年，係孟加拉國兩大證券交易所之一，亦係南亞地區其中一個著名證券交易所。達卡證券交易所前身為東巴基斯坦證券交易所聯會有限公司，响1964年正式名為達卡證券交易所。1971年，呢間交易所就因戰爭關係而停辦五年，直至1976年重開。响1993年11月，達卡證券交易所所有股票價格指數根據國際金融公司更改計算公式，漸漸呢個證交所成為南亞地區一個著名嘅證券交易所。
好喇！呢個證交所又點解會同中印兩國扯上關係呢？報道指中印兩國嘅企業爭奪孟加拉達卡證券交易所25%嘅股份。由於尼泊爾最近親中嘅左翼政黨勝出，加上緬甸响經濟方面同中國愈嚟愈多合作。因此，中國企業入股達卡證券交易所被印度視為中國「經濟入侵」南亞嘅下一步，藉此加深中國响南亞嘅政治影響力，所以印度方面不斷游說孟加拉當局接受印度企業嘅出價。
咁最後係點呢？就係達卡證交所董事會日前開會決定，由上海證交所同深圳證交所籌組嘅中國財團為優先競標人，擊敗印度籌組嘅財團。至於呢單「刁」做唔做得成，就要睇孟加拉金管部門喇！