除咗杏仁餅，蛋卷都係一款幾熱門嘅澳門手信，亦都係新年拜年其中一種熱門賀禮。除咗好食之外，最特別嘅地方就係用個鐵罐裝住啲蛋卷，食晒可以作儲物之用。


蛋卷嘅來源都有唔同嘅講法，其中一個講法就係話蛋卷嘅原型係法國嘅可麗餅（法國蛋餅）同天津嘅煎餅果子，後嚟傳到南方並加以改良，成為流行於南方嘅小食。據老行尊所講，以前整蛋卷要用人手開蛋漿，之後又煎又捲，比較考師傅手藝同功夫，依家唔少商家都以機械生產，少咗一份風味。