中式糕點除咗有黑色嘅芝麻卷，仲有白色嘅白糖糕。白糖糕有另一個稱呼，叫做「倫教糕」，咁係因為白糖糕源自明朝順德倫教區。相傳當時有位粥品店店主，喺蒸鬆糕嘅時候失手，令粉質下墜，但估唔到啲人覺得質地爽滑，反而更受歡迎。後來嗰位店主就改用白糖去整，令到啲糕就更加潔白晶瑩。


白糖糕主要材料有米、糖同水，不過做法就好繁複，又要磨米漿，又要發酵。同芝麻卷有啲相似，就係因為做法繁複，但又賣唔得貴，慢慢就愈嚟愈少餐館願意整嚟賣。咦？都唔係喎，深水埗有間小店有得賣，仲疑似好好生意。