佢嘅槍聲，震驚世界。韓國槍手安重根於1909年10月26日刺殺日本「明治憲法之父」、前首相伊藤博文，被視為反抗侵略嘅象徵。開槍之後，安重根即時被捕，喺翌年3月於旅順監獄被絞殺。

1905年日俄戰爭之後，伊藤博文獲委任為「韓國統監」。喺事發當日，伊藤博文搭火車到訪哈爾濱，當時俄國財政部長戈果甫佐夫到場迎接，伊藤博文落車後，俄國軍樂隊開始演奏，一批日本僑民揮舞太陽旗，其後戈果甫佐夫同伊藤博文共同檢閱俄國軍隊。就喺依一刻，混入日本僑民當中嘅安重根向伊藤博文開咗三槍。左胸、左腰同腹部中槍嘅伊藤博文隨即仆倒，身邊嘅人即刻扶佢返入火車，而一班俄國憲兵就將開槍嘅安重根捉住。

據講當時被扶返上火車嘅伊藤博文問係邊個開槍，當佢知道係韓國人後，就鬧咗句「混蛋」。疼痛難忍之下，隨行醫生倒咗杯白蘭地過佢，伊藤博文飲完最後一啖白蘭地後昏迷，最後逝世。安重根被人捉咗之後，喺第二年3月就被日本秘密絞殺，自此就成為韓國人嘅民族英雄。