提起葉亞來呢個名，可能無咩香港人識，不過佢嘅大名喺馬來西亞吉隆坡就響噹噹,，有條路仲係以佢嚟命名添。

葉亞來祖籍廣東惠陽，細個因家貧而停學，曾幫人哋放牛、打短期工等幫補家計。後嚟太平天國同清兵打仗，葉亞來為咗生計，跟住同鄉遠赴吉隆坡嘅礦場打工謀生。葉亞來因為性格豪爽、樂於助人而被推崇為礦工代表。後嚟佢結識當時雙溪烏絨（宜家芙蓉市嘅舊稱）嘅華人甲必丹（首領）嘅手下——劉壬光，並得到對方嘅賞識，做埋人哋嘅副手。1860年，當地兩個土酉部落為咗爭奪華人礦區嘅錫米稅收而發生械鬥，葉亞來憑住過人嘅交際手段從中周旋，雙方歷經半年爭鬥終於握手言和。而葉亞來亦因此被推選為雙溪烏絨嘅首領，當時佢只有24歲，真係後生可畏。

1862年，葉亞來喺劉壬光嘅邀請之下，前往吉隆坡幫手管理該地。吉隆坡當時係乏人問津嘅荒蕪之地，但勝在錫礦蘊藏豐富，葉亞來就係憑住開發錫礦發跡。幾年之後，劉壬光逝世，葉亞來頂上，做咗吉隆坡甲必丹。其後嘅四年內戰令吉隆坡變成廢墟，葉亞來為咗重建吉隆玻，向英商、新加坡、馬六甲華商借高利貸作為重建費用。佢首先發展公路網、疏通河流、建造橋樑、擴建住屋、重開礦場，鼓勵各族共同參與建設，同時招募中國工人嚟重建吉隆坡。慢慢咁，吉隆玻先由廢墟中逐漸發展成今日馬來西亞繁盛嘅都會。除此以外，葉亞來仲創辦咗吉隆坡第一間華僑學校，邀請中國教師任教，設立咗病人療養院等社會福利機構。

葉亞來原本想喺1886年返中國，不過就喺前一年一病不起，年方48歲就撒手人寰。佢出殯當日，全吉隆玻停工，並下半旗哀悼呢位吉隆坡之父。

圖為葉亞來畫像同葉亞來街，以及1884年嘅吉隆坡。網上圖片

#廣東講西