阿史之前講過幫孫中山打理荷包嘅廖仲愷，今日再講埋廖仲愷嘅太太何香凝。祖籍廣東南海嘅何香凝生於香港一個富商家庭，從小就好有主見，堅決唔紮腳，仲試過剪爛曬啲裹腳布，一對大腳搞到佢就嚟20歲都未搵到婆家。咁啱呢個時候，廖仲愷嘅屋企人聽從廖爸爸嘅要求，幫廖仲愷响云云三寸金蓮之中，搵一個無纏腳嘅新抱，於是就同何家一拍即合。

廖仲愷同何香凝結婚之後無幾耐，遇著清政府派人去日本留學，令廖仲愷都萌生赴日留學嘅念頭，一心為丈夫好嘅嘅何香凝就拎自己啲嫁妝首飾出嚟變賣，籌錢等丈夫去留學。翌年，何香凝都去咗日本讀書，識埋孫中山，隨後同丈夫一齊加入同盟會，仲做埋同盟會第一個女會員。

辛亥革命之後，廖仲愷伉儷始終追隨住孫中山，就連何香凝娘家嘅補貼，多數都用喺革命事業上。出錢之餘，兩公婆為咗搞革命更幾乎無命。有一次，同孫中山爭廣東管治權嘅陳炯明囚禁廖仲愷，何香凝為咗照顧丈夫，搞到自己操勞過度、患上痢疾。後嚟聽講陳炯明要槍殺廖仲愷，更加唔顧自己嘅身體情況，親自去同陳炯明講數，痛斥陳炯明：「仲愷幫孫先生籌款，你就要將佢鎖起來，但係之前仲愷都幫你哋籌過錢啊。唔通幫你就啱，幫孫中山就唔啱？」呢份據理力爭嘅氣概，連好多男人都比唔上，何香凝可謂係女中豪傑。雖然後嚟廖仲愷被釋放，但3年後遇刺身亡。丈夫去世之後，何香凝辭去國民黨一切職務，潛心畫藝。

講起上嚟，何香凝之所以讀美術，其中一個原因都係因為孫中山起義嘅軍旗、軍票等圖案需要有人設計。而何香凝亦相當有藝術天分，佢畫嘅畫充滿住革命精神同家國情懷。

圖為何香凝同廖仲愷一家合照，及何香凝作品《獅》。網上圖片