近年來，中國同東南亞各國關係愈嚟愈密切，特別响經濟合作上，東盟同中國建立咗自由貿易區，促進亞洲經濟發展。之但係，响愈嚟愈多合作嘅背後，中國同東南亞國家之間仲有唔少問題未解決，湄公河水資源問題就係其中之一。
湄公河係全球第十長嘅河流，全長約4180公里，起源於中國青海省，流經西藏、雲南，再流入老撾、緬甸、泰國、柬埔寨以及越南六個國家，係中南半島各國主要嘅淡水源，同時衍生出豐盛漁農業同水運網絡。而响湄公河上游，即係中國境內段，就叫做瀾滄江。
响十九世紀，法國人响中南半島建立殖民地，當時法國亦考慮過利用湄公河以水路進入中國，但經考察後認為湄公河太多瀑布同激流，最終無發展為航道。到咗二戰後，中南半島各地出現獨立潮，形成咗今日湄公河流經各國嘅局面。
咁中國同湄公河流域國家有乜嘢爭拗呢？中國計劃响瀾滄江西藏段同雲南段興建多個水壩，為中國西南部以至華南地區提供電力。之但係，興建電站水壩就會令湄公河流入中南半島國家流域嘅水量大減，破壞中下游國家嘅生態環境同自然資源。其實除咗中國，泰國、老撾都計劃興建電站水壩，令到下游嘅東埔寨同越南不時受乾旱之苦。湄公河流量依家視乎中國方面肯唔肯放水落下游，令湄公河水資源成為咗中國同東南亞國家之間嘅不穩定因素。
响2014年，湄公河流域多國應中國邀請，成立「瀾滄江－湄公河合作」機制，加強交流合作，至於各國能唔能通過協商解決問題，就要拭目以待喇！