上次講愛迪生嘅時候，好多史友都提起特斯拉（Tesla），不如今次就講下佢同愛迪生嘅恩恩怨怨啦。

話說特斯拉係一個好有發明天份嘅人，當時有個老闆好欣賞特斯拉，請咗佢，特斯拉不負所望，發明咗世上第一個感應電機模型，之後呢個老闆就寫咗封推薦信，介紹佢入去當時已經係大老闆嘅愛迪生度工作。當時愛迪生就研究緊直流電系統，愛迪生就叫特斯拉幫手改良直流電系統，如果事成就俾5萬美元佢（當時嚟講算係好多錢）。最後特斯拉成功咗，但愛迪生就無履行承諾，結果特斯拉就離開咗愛迪生嘅公司。

故事仲未完，特斯拉離開咗愛迪生嘅公司之後，就發明咗交流電系統，交流電系統比起愛迪生嘅直流電系統強得多，主要原因係直流電系統容易喺電線運送電力嘅時候散失，效率亦較交流電差，不利於長途傳輸。但愛迪生就繼續堅持發展直流電，兼同時就不斷抹黑交流電，愛迪生當時就試過喺演講嘅時候，捉啲貓貓狗狗，示範用交流電電死貓狗，試圖將交流電抹黑成一樣好危險、會引致死亡嘅一樣嘢。但佢覺得電死動物作用唔大，之後搵人發明咗電椅，說服官員用電壓只有1000伏特嘅交流電電椅處死犯人，結果嗰位不幸嘅死刑犯第一次無被即刻電死，要加電壓繼續電，結果個死刑犯被電到血肉模糊先至氣絕，過程十分殘忍。

愛迪生將特斯拉抹黑成「科學異端」，最終特斯拉之後患上交流恐懼症，晚年過住好困苦嘅生活。現時好出名嗰間電子車公司Tesla，當時創辦人就係用咗特斯拉個名嚟為公司命名。