聖誕節普天同慶，又點少得睇返套戲？响28年前，電影《寶貝智多星》橫掃北美票房，撼低《人鬼情未了》成為年度賣座王者，套戲仲成為應節電影之一，今日一於同大家齊齊回顧依套闔家歡電影。

《寶貝智多星》原班人馬响1990年同1992年一共拍咗兩集，第一集講到大懵嘅爸爸媽媽聖誕節同親戚帶埋成竇仔女去巴黎旅行，點知上埋飛機都醒唔起漏咗其中一個仔响屋企。而被漏低嘅主角、童星麥哥利高堅就發揮小宇宙，玩殘兩個諗住打劫嘅賊佬，成功守護家園。

麥哥利高堅响戲入面出盡法寶同賊人大鬥法，好似將門鎖加熱到超級燙手、噴水落地形成好滑嘅冰面、一拉燈掣會跌熨斗落嚟、一罐罐油漆綁繩變成流星鎚、開門撻著噴火槍等，睇到觀眾勁過癮。

至於第二部《寶貝智多星續集－玩轉紐約》，麥哥利高堅去到紐約Plaza Hotel，幫佢指路嘅路人其實好大牌，係當時未成為美國總統嘅特朗普。點解特朗普有份客串？因為當時佢係間酒店嘅老闆。望返劇照，特朗普二十幾年前嗰look同而家真係無咩分別（樣另計）。

講完電影講現實，麥哥利高堅拍完套戲之後迅速爆紅，不過大個之後走曬樣，仲爆出酗酒、吸毒同啪丸等醜聞，認真無眼睇。

劇照嚟自網絡。