聽日就係聖誕節，世界各地都會有唔少慶祝活動，甚至有啲活動今晚就已經開始舉行。平常嘅活動可能唔少史友們都參加過，但如果阿史同大家介紹「火燒羊」，唔知史友們又有冇聽過呢？
呢個神奇嘅慶祝活動係瑞典耶夫勒市嘅一個傳統，並且已經喺17號當日舉行咗喇！咁史友們可能會問，到底「火燒羊」點解會同聖誕節有關呢？其實喺當地呢種「聖誕山羊」一直都被視為係北歐聖誕象徵、傳統，呢種耶夫勒羊（Gävlebocken）早喺1966年就以「大草羊」嘅形式出現,當年由一個廣告顧問 Stig Gavlén 建議設計，最終建成高13米、長7米嘅草羊。之不過呢隻喺1966年12月1日建成嘅草羊，不幸就喺12月31日被人燒毀。
如是者去到1967年到1968年，「大草羊」都有繼續出現並且成功保存「生命」，建立「大草羊」呢個傳統亦都繼續。之不過喺1966至2009年間，「大草羊」都有因為唔同形式嘅破壞而「死亡」，生存率就只係得43%。如果要問點解當地人會破壞「大草羊」，可能係因為佢哋已經當成一種傳統喇！
原圖嚟自網絡