就算唔認得佢嗰名，都會認得佢做過套戲，佢係英國國寶級笑匠、「戇豆先生」路雲雅堅遜。路雲雅堅遜有好多威水史，包括2012年擔任倫敦奧運開幕儀式嘅表演嘉賓，不過搞笑背後，佢嘅成功之一啲都唔易行，需要克服重重難關。

路雲雅堅遜有口吃嘅毛病，加上樣貌同性格太文靜，怕怕醜醜咁，搞到中學讀寄宿學校時飽受欺凌。不過神奇嘅係，當佢一做戲，扮演緊另外一個角色嗰陣，口吃嘅毛病就會消失得無影無蹤，更加响舞台上發光發熱，可以話佢係整定食依行飯。

牛津碩士畢業嘅佢，1979年加入英國BBC參與戲劇節目嘅創作同演出，奮鬥十年，《戇豆先生》於1990年1月首次播出，憑住幽默情節、同隻熊仔嘅「對話」等，俘虜唔少觀眾嘅心。阿史最記得有幕戇豆先生將好多嘢塞曬入架車度，無位坐點算好？佢將單人座嘅梳化放上車頂，成個人坐上去，再用地拖棍控制架車，真係笑到碌地。

現實中嘅路雲雅堅遜一啲都唔騰雞，2001年佢同屋企人去非洲旅行，點知飛行途中機師突然昏迷，零駕駛經驗嘅佢親自揸飛機，等機師幾分鐘後醒返，班機安全著陸，全部乘客都安然無恙。

圖片嚟自網絡。