今時今日嘅電影入面，可以見到唔少演技精湛嘅女演員，其實大家又知唔知道，中國第一位女演員係邊位？答案係香港電影之父黎民偉嘅太太嚴珊珊。

一個世紀之前，女性想拍電影並唔容易。根據資料，中國電影於1905年出現，清政府當時頒布電影相關規定，寫明如果戲院想開門做生意，必須男女分開坐。睇戲已經係咁，更可況係拍戲？大銀幕中所見到嘅女角色，其實都係由男演員出演。

話說1913年黎民偉同美國人創辦香港華美製片，拍攝《莊子試妻》，套戲講莊周透過詐死嚟試驗老婆夠唔夠忠貞。黎民偉响戲入面男扮女裝，反串飾演女主角莊子老婆，而佢現實中嘅太太嚴珊珊就飾演配角婢女，令嚴珊珊成為中國電影史上第一位女演員，首次由女人扮演返女人。報道話，當時《莊子試妻》有响美國上畫，所以有唔少講法話，《莊子試妻》係中國第一部衝出海外嘅電影。

嚴珊珊生於廣東南海，係名門之後，於香港讀書畢業。拍完《莊子試妻》之後，佢先後拍過《胭脂》、《巫女復仇》、《再世姻緣》等電影，最後於1952年逝世。

圖為嚴珊珊以及佢同黎民偉嘅結婚相。網絡圖片