道教係中國嘅傳統宗教，咁唔知大家又知唔知，原來响離香港唔係好遠嘅地方，就有一個中國十大道教名山之一呢？呢個地方就係羅浮山。


羅浮山位於廣東省博羅縣，隸屬惠州市。博羅呢個地方可以話歷史悠久，早响公元前214年就置縣。之但係，相傳呢個地方响春秋時期出現過一個叫縛婁嘅小國，但由於呢個小國只係記載响《呂氏春秋》當中，普遍認為尚未有足夠證據證明博羅就係縛婁古國所在地。講返羅浮山，據文獻所載：「博羅有羅山，以浮山自會稽來傅之，故名羅浮。」至於點解羅浮山成為中國道教名山之一，就同東晉道教術士葛洪有關。响東晉咸和年間，葛洪就响羅浮山養生修道，仲創建咗白鶴觀、沖虛觀、黃龍觀同酥醪觀四座道觀。葛洪响羅浮山修道終老。至於點解佢會揀羅浮山修道，其中一個講法就話羅浮山周邊一帶盛產丹砂，葛洪就可以好方便咁搵到原材料煉丹喇！