早兩個月提到電影「十三姨」嘅原型係黃飛鴻第四任妻子莫桂蘭，有唔少史友都好有興趣，咁啱阿史之前放假去咗佛山嘅黃飛鴻紀念館，見到莫桂蘭嘅資料，今日一於同大家再講多啲。

莫桂蘭細細個已經學莫家拳，嫁咗之後，黃飛鴻亦有傳授武功過佢，令莫桂蘭嘅武術日益精進，佢仲做過福軍拳術教練同黃飛鴻弟子鄧芳開設嘅「義勇堂」助教。

黃飛鴻過身後，莫桂蘭為咗延續同傳揚丈夫嘅武藝，於四十年代到六十年代期間，先後响灣仔告士打道同筲箕灣開設「黃飛鴻國術」及「黃飛鴻健身學院」。根據黃飛鴻紀念館資料，莫桂蘭1955年仲參與拍攝由慈善伶王新馬師曾主演嘅電影《乞兒太子》，响戲入面打咗成套虎鶴雙形拳同鞭法，展現南拳真功夫，响當時嘅舞台電影中比較罕見。

圖一為莫桂蘭與弟子及《乞兒太子》工作人員合照。