喺清末年間，太平天國領袖、廣東花縣人洪秀全非常唔妥孔子同儒家經典，於是就喺《太平天日》作咗個故事嚟唱衰孔子。

《太平天日》入面聲稱，上帝見到洪秀全，就同佢講孔子啲書有錯、「讀壞人」，又怪孔子名聲大過上帝，搞到啲人唔識上帝；孔子開頭沉默以對，見到好多神仙都怪自己，於是同班妖魔一齊「走佬」，點知被洪秀全同一班天使捉咗返去，五花大綁咁押到上帝同基督面前。上帝好嬲，命令天使鞭打孔子，打到孔子跪地求饒，上帝見到咁就放過孔子一馬，俾佢喺天堂享福，但就唔准再下凡，以免孔子再「教壞人」。

呢個故事聽落幾有創意，亦都可以話佢老作，講到尾打擊孔子都只係洪秀全建立權威嘅一種手段。除此之外，洪秀全建立太平天國之後，四處拆毀學宮，又焚燒孔孟諸子百家經書，一度諗住將四書五經列為禁書，但最終被「天父下凡」嘅楊秀清阻止先至無實行。

圖為曾經飾演洪秀全嘅呂良偉同飾演孔子嘅周潤發，圖片取自網絡。