近一個星期，唔少朋友都非常期待聖誕節嘅到來，普天同慶又有假放，正呀！同香港一海之隔嘅澳門，假期都唔少，除咗之前介紹過嘅醉龍節之外，其中一個12月嘅假期——聖母無原罪瞻禮都非常有特色，澳門仲係少數將佢列為假期嘅亞洲地區添。

澳門曾經係葡萄牙殖民地，東西文化交匯，至於聖母無原罪瞻禮依嗰天主教節日傳入澳門嘅原因，亦都係同葡萄牙有關。葡萄牙傳統上信奉羅馬天主教，响 1646年，國王約翰四世於里斯本皇家聖堂承認同支持「聖母無原罪」嘅神學觀點，所以葡萄牙同海外領土都要乖乖跟從，連澳門嘅葡萄牙人都唔例外。

與此同時，住响澳門嘅葡萄牙人亦帶嚟本身嘅文化習俗同生活方式，令部份宗教活動融入澳門社會。回歸後，香港同澳門都保留部份原有假期，而澳門繼續响12月8號放「聖母無原罪瞻禮」假期，可以話係對宗教、傳統同歷史嘅一份尊重。

圖片嚟自澳門雜誌。