黃花崗七十二烈士就聽得多，但黃花崗起義就未必個個人知咩事。話說喺武昌起義之前，革命黨人都經歷過唔少失敗嘅起義，黃花崗一役可以話係當中最著名嘅戰役，連孫中山都講過嗰次行動「驚天地，泣鬼神，與武昌革命之役並壽」。

話說1910年11月廣州新軍起義失敗之後，孫中山同同盟會主要成員開會決定喺廣州再次起義，由革命黨人黃興、趙聲負責統籌。當時原本計劃翌年兵分十路攻下廣州，但武器同籌款仲未到齊之際，佢哋眼見清廷開始加緊防備，於是修改計劃，由十路改為四路，喺1911年4月27日發動起義，但最終只有黃興率領嘅一路人馬有所行動，百幾人進攻兩廣總督署。

兩廣總督張鳴岐收到風先一步走佬，又向廣東水師提督府搬救兵。最終黃興一行人去到總督署搵唔到張鳴岐，於是放火燒咗總督署。咁啱喺佢哋離開嘅時候，撞正張鳴岐班救兵，結果寡不敵眾，有86人當場犧牲或者被捕處決，清廷之後仲將革命份子嘅屍體放喺街上示眾。後來有同盟會嘅記者搵到72具遺骸，將一班烈士葬於黃花崗。

原圖為黃花崗七十二烈士墓及部份被捕烈士。取自網絡