陳炯明係海豐人，早年參與革命黨嘅起義。民國成立之後曾經做過廣東副都督，但就俾支持袁世凱嘅龍濟光打敗咗，要離開廣東避風頭，後嚟袁世凱稱帝，佢先後返去廣東討袁。1917年，佢率領援閩護法粵軍攻打福建，兩年後佢打贏咗由桂系操縱嘅廣州軍政府，正式入主廣東做省長。

其實當時嘅陳烱明，响廣東嘅聲名比孫中山仲要高，一來佢係軍頭，又係廣東人，廣東班商人覺得陳烱明可以保護到佢哋嘅安全，二來孫中山成日話要北伐，但陳烱明就主張聯省自治，商家同地方官員自然覺得陳烱明嘅主張更符合當時廣東嘅利益。孫陳兩人响廣東鬥到難分難解，結果陳烱明就响1922年6月16日率領部下粵軍以軍事行動驅趕孫中山，史稱「六一六事變」。

不過，陳烱明呢次驅趕孫中山，換嚟嘅就係孫中山將佢响廣東嘅軍事勢力徹底消滅。1923年1月，孫中山派出東西兩路「討賊軍」合擊陳炯明，陳炯明宣佈下野並退守惠州，孫中山得以重返廣州。1925年，當時已經得到蘇聯支持嘅佢，手上又有黃埔軍校呢個重要軍事勢力，於是就派兵消滅陳烱明嘅軍隊。結果當然係陳烱明解散咗自己嘅軍隊，退居香港。

其實睇返呢段歷史，就知道孫中山當時响廣東其實唔係真係好受歡迎，班商人除咗支持陳烱明外，仲响1924年發動過廣州商團事變。不過，後嚟國民黨統一咗全國，掌握咗政治話語權，陳烱明呢類同孫中山打對台嘅軍頭自然被形容得負面。