唔知大家有無睇過一部叫《海豚灣》（The Cove）嘅紀錄片？2009年呢套紀錄片一出，引起好大關注，橫掃多地嘅電影獎項不特止，翌年仲毫無懸疑咁奪得奧斯卡最佳紀錄片。

《海豚灣》主要記錄日本和歌山縣太地町大量捕殺海豚嘅現象，由於太地町所有捕殺海豚嘅區域都係禁區，有日本漁民同警察把守，外人難以入內，更遑論拍攝。為咗記錄低當地漁民獵殺海豚嘅片段，導演召集咗美國一眾生物學專家、海豚專家、潛水好手等專業人士利用防水拍攝道具錄製而成。片入面記錄咗當地人點樣獵殺海豚：將成群海豚驅趕到海灣，然後用漁網圍獵。最令阿史印象深刻嘅一幕係，漁民用漁網困住啲海豚，再用長矛捅殺佢哋，畫面見到原本蔚藍色嘅海水，一瞬間染紅，仲越來越紅……因為海豚係極度群體化嘅動物，佢哋唔會拋低受傷、疲憊或弱小嘅家人而獨自逃生，就係咁，被困嘅海豚往往會被一網打盡，滿門被誅。

其實海豚體內嘅重金屬含量極高，所以海豚肉嘅售價極低，賣海豚肉可以話係蝕本生意。真正有利可圖嘅係活生生嘅海豚，被商人揀中嘅海豚經過訓練後會被賣去水族館同商場，用嚟表演賺錢。咁點解被揀剩嘅海豚都會無命？因為日本嘅漁民認為，海豚、鯨魚等大型動物會食咗細魚從而令漁獲減少，仲話殺海豚係佢哋嘅傳統文化，同西方國家殺牛羊無分別。其實海豚嘅生與死，在乎人類嘅一念之間。

原圖嚟自網絡。