上次講開「麻雀學校」，阿史就諗起「鷄記」，事關之前行街經過，有時都會見到大大個霓虹燈，寫住「鷄記蔴雀娛樂」，唔講唔知原來鷄記第一間麻雀館係喺1930年代創立，至今已經有超過80年歷史。

「阿鷄」林坤早於二十年代由廣東新會落嚟香港，身上只有三毫半，無親無故嘅佢喺油麻地天后廟門外露宿，當時廟祝就介紹佢去雞欄工作。努力嘅阿鷄後嚟成為買手，直至東主年老結業，佢就自立門戶，做活雞生意，之後又整啲滷水雞拎去榕樹頭擺賣，結果因為啲滷水雞大受歡迎，就有咗阿鷄嘅稱號。

阿鷄後來轉型走去賣生果，喺三十年代，有日佢賣晒啲生果就走去買馬票，結果中咗105蚊，當時足夠買樓「上車」。阿鷄用筆錢開咗間士多賣生果同綠豆沙，間鋪慢慢變成街坊聚腳地，佢就開啲麻雀枱俾街坊打牌，乘機吸引多啲人嚟買零食、買汽水。當時，贏錢嘅街坊會自發抽起2仙俾阿鷄，用嚟修補嗰啲竹造嘅麻雀。阿鷄見越來越多人嚟打牌，再加上有利可圖，就索性開「鷄記蔴雀」，成為麻雀館嘅雛形。

到咗1956年，政府諗住取締所有麻雀館，鷄記第二代傳人「鷄叔」林國強獲同業邀請成為港九蔴雀商會主席，成功爭取政府改為發牌規管，而鷄記亦成為首間持牌麻雀館。因為當時政府唔想鼓吹香港人賭博，於是牌照上變做「Mahjong School（麻雀學校）」，漸漸啲人就用「交學費」形容打輸麻雀。

原圖取自網絡。