相信大家都知道，依家有唔少中國同香港人都會到海外留學，當中去美國係唔少莘莘學子嘅求學熱點。好喇！咁大家又知唔知中國第一個到美國留學嘅人係邊位呢？原來呢個人係來自廣東。
呢個仁兄叫容閎，亦被稱中國留學生之父。佢喺响廣東香山即係依家嘅中山出世，佢曾經跟住爸爸去澳門生活過一排，期間入讀咗由教會辦嘅澳門馬禮遜學校。後嚟間學校搬咗去香港，佢都跟埋去，學校位置就係今日香港摩利臣山。
而佢去美國留學嘅契機，就係同馬禮遜學校有關，當時呢間學校嘅校長鮑留雲退休返美國，佢想帶幾個中國學生去美國接受西式教育，就係咁容閎就赴美升學喇！容閎去到美國入讀咗孟松中學，後嚟更考入名校耶魯大學。不過佢去到美國並唔係一帆風順，對佢嚟講最大嘅問題就係錢，因為教會資助佢嘅錢响入大學前已經用哂，想讀大學就要自己諗辦法。據講當時有教會肯資助佢讀大學，但條件係佢畢竟後要做傳教士，結果佢寧願自己半工讀都唔願接受資助。
响1854年夏天，容閎獲得耶魯大學文學士學位，成為第一個受過完整美國教育兼取得學位嘅中國人。畢業之後佢並無留响美國，而係返咗中國推動教育事業，最出名嘅就係佢响1872年帶住一班中國少年分批到美國求學，呢批少年當中就有後嚟成為外交官嘅唐紹儀、劉玉麟，中國鐵路之父詹天佑、以及香港行政局首任華人官守議員周壽臣等。