睇到「中山艦」呢個名，都一定聯想起孫中山，無錯，佢的確同孫中山有關，背後仲有段故添。

中山艦原名永豐艦，係一艘炮艦，原本係清政府喺甲午戰爭慘敗之後，向日本三菱船廠特登訂造嘅，之後被編入北洋海軍第一艦隊。至於永豐號點解會同孫中山扯上關係，就要由護法運動之後講起。話說當時擔任海軍總長嘅程璧光係孫中山嘅好朋友，佢喺孫中山嘅說服下，喺1917年7月底率領永豐艦等七艘軍艦，南下廣州組成西南護法艦隊。1922年6月，粵軍總司令陳炯明率領部下圍攻總統府同孫中山嘅住所粵秀樓。孫中山收到風，輾轉登上永豐艦，喺艦上指揮將士同陳炯明嘅部隊作戰，仲喺艦上生活咗55日。1925年孫中山逝世，廣東革命政府為紀念佢，將永豐艦改名為中山艦，表示要「繼中山未竟之志，事中山未竟之事」。

講到中山艦最出名嘅就梗係「中山艦事件」，1926年3月，當時國民黨嘅中央執行委員蔣介石以中山艦擅入黃埔為由，扣押艦隻，並包圍及搜查蘇聯顧問團嘅住所，惹起外界關注。後嚟抗日戰爭爆發，中山艦由岳陽開赴武漢，參加武漢保衛戰。就係武漢失守嘅頭一日，停泊喺金口錨地嘅中山艦被日本敵機俯沖轟炸及不斷掃射。中山艦艦長連同士兵共24人陣亡，一代名艦最終沉沒金口江底。

圖為中山艦以及孫中山、宋慶齡同官兵喺中山艦合照，原圖嚟自網絡。