年初四返工等於咩？打工仔梗係答你：年初四咁樣。秘書妹妹突然响隔離講咗句：唔明，即係咩樣？阿史當堂呆咗一兩秒，佢平時咁醒，過完年突然咁應節，豬咗？

其實「年初四咁嘅樣」係嚟自周星馳1998年嘅電影《行運一條龍》，套戲仲有吳君如、吳孟達、李兆基等好戲之人。講返句經典對白先，話說劇情講到間茶餐廳畀業主姣婆四，即係吳君如逼遷，茶餐廳老闆吳孟達就叫夥記周星馳諗計仔拆掂佢。而當吳孟達形容姣婆四嘅外貌係「年初四咁樣」，搞到周星馳面都青埋。點解？吳孟達解釋，「年初四，假又放完，錢又使曬，工又要返，點會有好樣！」講到依度，相信大家都明白曬。雖然今年唔少人都要年初四開工，不過駁住星期六日，已經算係咁喇。

原圖嚟自網絡。