之前有新聞講到明朝開國君主朱元璋嘅女，即係懷慶公主個墓入面有貓骨，相信懷慶都係貓奴之一。其實明朝唔單止懷慶公主，嘉靖皇帝朱厚熜同樣好中意貓貓，仲設立貓兒房揀選靚貓，擴充「後宮」添。

古代宮中都有養貓，不過去到嘉靖年間就更誇。根據太監劉若愚嘅《酌中志·內府衙門職掌》記載，貓兒房係宮貓嘅管理機構，近侍有三四個人，專門飼養御前有名有份嘅貓咪。貓兒房耐唔耐會响一班「宮貓」之中選出極品靚貓，再獻畀皇帝，相伴天子左右，其餘嘅會用嚟賞賜皇親國戚。

依批宮貓同人一樣分等級，據記載，嘉靖最中意嘅貓貓叫霜眉，毛色淡青色，眉毛位置雪白，因而得名。霜眉好醒目，次次嘉靖想去邊度行兩行，霜眉都好有靈性咁行响前面帶路，而嘉靖就寢時，霜眉都唔會離開。嘉靖有幾中意佢？霜眉被封做「虬龍」，意思係小龍，响貓界嘅地位拍得住皇帝仔，就知佢幾有身價。霜眉過身之後，嘉靖下令用金棺材厚葬，等佢長眠景山山腰嘅古柏之下，個墳名為虬龍塚，極盡榮寵。

隨住時代更迭，部份宮貓嘅後代繼續住响故宮，同其他流浪貓成為紫禁城「保安」，負責返貓貓最經典嘅任務——捉老鼠。故宮為木結構建築群，鼠患係一大威脅，班貓貓依家夜晚不時穿梭於紅牆同琉璃瓦之中，落力守護家園。

圖為棲身故宮嘅貓貓。網絡圖片