早排阿史就同史友們介紹到喺宋朝做官人工高、福利好、假期又多，絕對係咁多個朝代當中做官嘅首選。咁如果講到做官做得比較慘嘅朝代又會係邊一個呢？今次阿史就同大家講一講明朝啦！
其實講起明朝嘅官員俸祿，喺立國之時並唔算低，喺明太祖朱元璋在位期間就分別定立過三次並且以糧食「擔」作為單位，正一品官員年俸祿1044擔米、正二品俸祿732擔米、而去到正七品官員就只係得返年俸祿90擔米，換算返就即係得今時今日1萬人民幣多啲，呢個數目以一個剛剛立國嘅國家嚟講，都仲係可以生活到。
之不過問題嚟喇，史友們有冇諗過喺明朝做官唔單止270年冇加過人工，甚至仲可能人工愈做愈少呢？喺明朝270年歷史當中，其實政府唔單止從未幫官員加過人工，甚至後來官員嘅人工一部份係以銀子、布帛以及紙鈔發放，但隨住政府濫發紙鈔導致貶值，明朝官員人工由原本可以維持家計，最終都變成收入不足，普通街邊一個說書人講多幾場書都多過做官，真係估佢唔到！
原圖嚟自網絡