麗新集團創辦人、亞洲電視永遠榮譽主席林百欣喺2005年今日病逝，之前都同大家回顧過林伯嘅一生，佢除咗將麗新集團嘅事業王國擴展到零售、地產、傳媒等領域之外，仲將亞視大改革，製作同播出唔少經典節目。除咗發展事業之外，林伯做善事亦不遺餘力。

林百欣喺廣東汕頭出生，上世紀30年代隨父親嚟香港，入讀九龍城民生書院。1935年，林伯返汕頭喺叔父嘅銀號學做生意，之後入咗汕頭嘅佳成銀行由低做起，日頭辛勤做嘢，夜晚仲不忘進修。二戰之後，林伯返到香港經營成衣，由成福織造廠到之後嘅麗新製衣廠，製造嘅成衣出口到歐美等地，成為香港首屈一指嘅成衣製造商。林伯當年大膽接咗張東非訂單，攻佔非洲市場，被同行冠以「非洲王」稱號。

事業取得大成功之餘，林伯亦不忘回饋家鄉同社會。早喺80年代，林伯就喺潮汕、中山捐建多間中小學，隨後又喺汕頭耗資增建大型圖書館，以及慷慨捐輸，改善家鄉嘅食水問題。林伯熱心捐建學校同醫院，因而成為廣洲、汕頭、昆山、廈門等城市嘅榮譽市民。2003年SARS襲港，林伯隨即捐款俾香港大學，資助港大教研基金，其後又捐款成立「香港大學林百欣學術基金」，推動「饒宗頤學術館」嘅教學研究。繼香港大學之後，林百欣亦陸續向理工大學、中文大學捐款，分別用作教育基金同眼科醫學研究。數十年間，林伯對國內、香港嘅捐款總數高達七億元。

圖左為林百欣，原圖嚟自網絡。