個日响睇到個面書一篇介紹「一帶一路」國家嘅帖，阿史真係大鄉里，原來伊拉克係「一帶一路」國家之一，既然係咁，今次就介紹一下呢個既熟悉又陌生嘅國家。

講起伊拉克，香港人可能淨係識首都巴格達，因為新聞成日報巴格達成日有自殺式襲擊。但今次阿史想介紹嘅係有「東方威尼斯」之稱嘅東南部城市巴士拉。巴士拉位於底格里斯河同幼發拉底河交匯嘅阿拉伯河西岸，距離波斯灣只係55公里。由於呢個城市連接咗波斯灣同內河，所以係伊拉克國內第一大港口城市，同時亦係伊拉克第二大城市，極具戰略價值。

由於水資源充足，所以呢個城市一直擁有住繁榮嘅商業同獨特嘅文化，《一千零一夜》嘅仙巴就係响呢個城市出發縱橫七海。有咁優越嘅地位，加上風景如畫，所以呢個城市有東方威尼斯美譽。咁好嘅地方，响千幾年以來自然係兵家必爭之地，鄂圖曼帝國其中一個海軍基地就係响呢度。後嚟英國响一戰期間就霸咗呢個城市，所以呢個城市就雲集咗往來歐洲同印度遠東嘅商船。

不過，呢個城市响二戰之後巴士拉曾經係波斯灣其中一個最繁榮嘅城市，除咗係內河出海處之外，更重要嘅係石油資源。不過，七十年代開始，呢個城市就似乎無乜運行，兩伊戰爭、第一同第二次海灣戰爭，都波及呢個古老城市。好似响第一次海灣戰爭，美軍嘅空襲就炸中咗市內有過千年歷史嘅巴士拉清真寺等；第二次海灣戰爭美英聯軍就第一個攻陷嘅重鎮就係巴士拉。近年，巴士拉同其他伊拉克城市一樣，出現自殺式恐怖襲擊。不過，咁呢個城市係咪無乜希望呢？咁又唔係，因為呢個城市正逐步重建當中，出現咗唔少西方現代建築。如果真係覺得伊拉克响「一帶一路」戰略下會有機遇，巴士拉可能可以作為一個選擇，相對其他伊拉克城市。