繼續同史友們介紹世界各地嘅最新考古發現，曾經受到戰火波及嘅伊拉克有住悠久嘅歷史，國內嘅文化遺產以及古蹟都係多不勝數。近日，由美國以及伊拉克組成嘅考古隊就喺一個古蹟廢墟之下發現到8幅石雕，今次阿史就同大家講一講。
其實呢次所發現嘅石雕就係喺著名嘅亞述帝國首都尼尼微城嘅大門馬什基門（Mashki Gate）。呢道大門本身就係當地嘅著名古蹟，但點知喺2016年就受到戰火波及而摧毀。結果喺伊拉克摩蘇爾大學、美國賓夕法尼亞大學嘅專家組成考古隊嘗試修復大門之時，就喺考古發現搵到8幅大理石石雕，當中就雕刻咗好多戰爭嘅場景，就好似有弓箭手拉弓瞄準遠方咁樣。
據專家推斷，呢啲石雕嘅歷史可以追溯到2700年前嘅亞述國王辛那赫里布時代，原本呢啲石雕應該係用嚟裝飾辛那赫里布宮殿，但到底點解會被送到大門再被沙土掩埋呢？咁就需要進一步考古發掘同研究先有可能知道喇！
原圖嚟自網絡