燒豬大家食得多，蒸全豬又食過未？上一輯《阿爺廚房》拍攝過均安蒸豬依道菜，仲大讚肉質肥而不膩，真係聽到都想食。原來均安蒸豬嘅歷史可以追溯到「太公分豬肉」時代，話說去到大時大節啲男丁都有豬肉分，而响均安，佢哋分嘅正正就係蒸豬肉。

鼎爺提過，佢細細個都食過均安蒸豬，依道菜被稱為順德名菜中嘅「貴族」，當地有喜事先會食佢。均安蒸豬多數响祠堂蒸煮，用嚟祭祖，流傳至今，成為當地重要嘅傳統文化習俗。當地人通常會揀成百斤嘅豬，經過醃製之後，擺落個好大嘅豬盒度蒸煮，過程中會蒸走啲油脂，加上個蒸盒有好幾個窿，都可以排走油脂，所以豬肉食落去肥美又乾爽。

好識食嘅蔡瀾曾經帶團到順德覓食，其中一道菜就係均安蒸全豬。蔡瀾讚蒸豬肉口感爽，有豬味，佢覺得最地道嘅吃法係好似花和尚魯智深食狗肉咁，用手食。蔡瀾仲講過，啲肉唔可以切太薄，如果唔係就無咗嘅個種「豪邁嘅味道」。

資料來源：《文化·傳承》順德篇