結婚係人生大事，梗係要搞到好好睇睇，尤其係舊時嘅新人，一定要將間屋佈置到靚一靚嚟拜堂。不過，如果遇著間屋又細又迫，點算好？咁就要租返間豪華大宅嚟補吓飛喇。

話說喺明清時期，廣東佛山嘅人口已經好密集，大部份人嘅屋企都好細好擠迫，偏偏果時嘅婚禮又講究形式，一定要濟濟一堂、熱熱鬧鬧咁先好。因此，嫁娶屋就應運而生，專門出租場地作婚禮用途。而佛山現存嘅嫁娶屋，以嶺南天地內嘅文會里36號、38號、40號最為完整。文會里嘅呢組建築始建於清初，原本係楊氏家族嘅大型宅第建築群，到咗清朝中葉，宅第易主，逐漸改成嫁娶屋出租。

清代時期嘅嫁娶屋既豪華體面，又整齊美觀，左右各有鋪石小巷，主體結構採用三進院落四合院式佈局，兩邊仲有儲物間、廚房、台凳、餐具、新房、客房等相應設備。成棟嫁娶屋寬敞美觀、用料講究，設施相當完善，一場得體婚禮嘅成個過程都可以喺嫁娶屋度圓滿完成，所以相當受廣大民眾歡迎。

現代婚禮已經好少會用到舊時嘅排場，所以租嫁娶屋嚟舉行婚禮早已式微。而宜家嘅佛山嫁娶屋由2013年開始開放成為新人舉行嶺南特色婚禮嘅場地，近呢幾年嚟有多對新人喺果度舉行集體婚禮，體驗吓傳統嘅婚禮儀式。

資料嚟自《文化·傳承》禪城篇，圖為文會里嫁娶屋同集體婚禮照，原圖嚟自網絡。