早排去朋友屋企拜訪，auntie親自落廚煮兩味，期間一嘢用九江雙蒸整落鑊邊，當堂滿室酒香，個肚打曬鼓。其實中國有唔少酒都好出名，好似五糧液、茅台等等，今次就同大家講吓有成二百年歷史嘅九江雙蒸有咩故事。

話明係九江雙蒸，就梗係嚟自九江啦，九江係佛山南海嘅一個鎮，好耐以前九江啲酒就已經非常出名，有句俗語仲話「無需杏黃招客至，九江自古是酒鄉」。九江雙蒸酒始創於清朝道光初年，清代有詩人飲過雙蒸酒之後，就寫咗句「垂竿布網閒中事，慶舉雙蒸醉月明」。

九江雙蒸酒最特別嘅地方係要經過兩次發酵、重蒸所得，所以就叫做「雙蒸」酒喇。據講，九江雙蒸嘅出現，其實係源自一場意外，話說喺九江一間夫妻檔酒莊，個太太搬啲啱啱蒸好嘅酒嗰陣，唔小心將埕酒倒咗落一桶未蒸嘅酵飯裡面，對夫妻唯有就再拎呢桶酵飯再蒸多次，點知咁樣蒸兩次就令啲酒更加正、更加純！

原圖取自網絡。