舊時無依家咁方便,想有熱水沖涼唔係咁易。喺五六十年代初,如果喺屋企想要熱水,就要燒柴、燒煤自己煲,煩過而家多多聲,想煲一壺水,要等成十幾二十分鐘先滾,想煲水沖涼?兄弟姐妹多嘅話,真係等到聽朝都似。正因為咁,當時出現咗一個好流行嘅行業,叫做「泡水館」,其實係一個專門賣熱水嘅地方嚟嘅。
當時港澳同上海都有唔少人响廣州做生意同居住,大眾對熱水都有一定需要,所以高峰時期,市內有多達超過一百間呢啲泡水館。佢哋通常喺門口會有個大灶頭,上面就有個大銅鍋,鍋上就有條水管方便加水,而下面就有個龍頭用嚟賣水。當時啲人就會拎住個熱水壺,走去泡水館買熱水。
除此之外,有啲泡水館仲會整埋沖涼房,方便客人買完水就喺度沖涼,大概沖一壺3磅嘅熱水就要2分錢、一桶沖涼水就1角,呢啲泡水館平時每日大約賺幾蚊到十幾蚊,而當時一般工人大約賺30至40蚊左右。喺嗰個年代,唔少工廠工人同埋結婚無耐嘅小夫妻因為居住地方細,無地方沖涼,就會幫襯呢啲泡水館。去到每年年卅晚,泡水館就會大排長龍,賺多平時3、4倍添。
原圖取自網絡。
評論:
共0 條評論