阿史前排同秘書妹妹lunch，秘書妹妹叫咗碗叉雞瀨，佢問阿史點解瀨粉叫瀨粉，阿史就答佢係因為食完會瀨吖嘛，結果秘書妹妹好無奈咁睥住阿史。

睇返資料，其實瀨粉之所以叫瀨粉，係同製作手法有關嘅。關於瀨粉嘅來源，其中一種講法話係由以前佛山高明嘅瑤人傳俾漢人嘅，話說高明當地主要係一啲丘陵同埋台地，土地瘦瘠，於是當地人每年秋收之後，都會將啲米曬乾、磨粉，積穀防飢。後來就有人就將啲米嘅粉煮成米漿，再倒落個有好多細窿嘅鐵篩，啲米漿就通過啲窿漏落啲熱水到，有人就用「瀨」形容呢個情形，亦都有人話「漏」同「瀨」响方言嘅讀音一樣，於是慢慢叫呢種粉做「瀨粉」喇。

資料來源：《文化傳承》高明篇

原圖取自網絡。