唔知大家鍾唔鍾意食大樹菠蘿？唔好以為大樹菠蘿係熱帶生果，得東南亞地區先種到，原來廣州都曾經引入過大樹菠蘿。大樹菠蘿原產地係印度，又叫做菠蘿蜜，源於佛經入面嘅「波羅蜜」，意思即係到達彼岸咁解。根據《隋書》、《酉陽雜俎》、《廣東新語》等史料記載，早喺南北朝時期嘅梁朝，就有個叫達奚嘅印度大臣漂洋過海嚟到中國，將大樹菠蘿種喺廣州嘅南海神廟，呢間南海神廟，就係早排同大家講過嘅波羅廟喇。而後嚟喺嶺南其他地方種植嘅大樹菠蘿，都係南海神廟嘅大樹菠蘿嘅後代子孫。

元朝劇作家湯顯祖曾經寫過首詩《達奚司空立南海王廟門外》，將達奚種大樹菠蘿嘅故事描寫到更加神奇。首詩話達奚登岸之後，就地挖個窿，埋咗兩粒大樹菠蘿嘅種子諗住種棵樹留個紀念，點知突然刮起一陣大風，將隻船吹走咗，搞到佢無辦法返鄉下。於是達奚日日翹首以盼，希望會有人助佢回國，日日等就日日失望，最終仰天長歎，化成一尊雕像。計阿史話，傳說還傳說，一陣風都吹得走嘅船，搭之前真係要諗過先……

資料來源：金羊網

原圖嚟自網絡。