早幾日同大家講過蘇東坡被貶去惠州之後，唔單止出錢出力幫惠州百姓起堤壩，仲引入咗「秧馬」嚟提升農夫耕作嘅效率。不過，原嚟唔單止惠州百姓受過蘇東坡恩惠，連附近嘅廣州百姓都有受惠。

話說蘇東坡被貶之後，喺去惠州上任途中，都曾經喺廣州逗留過幾日。當時嘅廣州城區臨近大海，海水容易倒灌湧入內陸嘅淡水資源，令附近嘅井水變得又鹹又苦，唔少人仲因此染病。蘇東坡對當地嘅淡水分佈有一定了解，又喺一間寺廟四周嘅自然環境度攞到靈感，即刻將自己諗到嘅「自來水」供水計劃話俾廣州太守知。蘇東坡建議喺廣州嘅淡水源下面起個大石槽，用五枝大竹管引水，然後透過竹管逐步接駁入城，再喺城內起一個大石槽，同樣用五枝大竹管分流淡水去廣州各處，令百姓可以飲用到乾淨嘅水。

圖為廣州自來水裝置圖同蘇東坡像，原圖嚟自網絡。