一講起「嘉道理」，大家可能剩係諗起嘉道理農場，不過嘉道理家族嘅生意其實點止咁簡單。

嘉道理家族係香港其中一個顯赫有名嘅富豪大族，祖先來自伊拉克首都巴格達，後來輾轉去到印度孟買、中國上海發展生意。1881年，艾利•嘉道理獨自嚟到香港發展，用佢哥哥伊利士所俾嘅500蚊，開咗香港第一間股票經紀行，除咗幫客人做買賣，仲做埋投資顧問，幫客人賺咗唔少錢。後來佢買入咗中電嘅股票，並且不斷增加投資，成功控制中電。

艾利收購中電之後，就以紅磡作為基地，興建發電廠供電俾九廣鐵路同半島酒店。不過喺生意上咗軌道之後，艾利就因病逝世，遺產由佢兩個仔羅蘭士同賀理士繼承。羅蘭士自18歲開始就喺中電工作，每日由朝早8點半工作到6點，風雨不改。喺香港保衛戰期間，羅蘭士就奉港英政府嘅命令，炸毀鶴園發電廠，阻止日軍得到電力，响香港淪陷之後，羅蘭士同部份香港重要人物被運到上海軟禁。戰後羅蘭士成為第一批返港嘅戰俘，修復電廠設施，幫助香港重建。

至今，嘉道理家族繼續持有中電，並由羅蘭士個仔米高•嘉道理出任主席。除咗中電，嘉道理家族亦進軍酒店業，持有嘅香港上海大酒店有限公司，管理世界各地多間豪華酒店，包括香港尖沙咀半島酒店。而米高•嘉道理現時係香港最富有嘅外籍人士，身家達85億美元，喺《福布斯》香港富豪榜中排第9。

原圖取自網絡。