近排無綫播緊最新一輯嘅《倚天屠龍記》，裡面嘅男主角張無忌身邊成日都有靚女陪住，真係令唔少男觀眾羡慕。講起張無忌嘅身世背景，同歷史上外號「小明王」叫韓林兒有啲似，好有可能係張無忌嘅原型。 

據《明史》記載，韓林兒嘅祖先係白蓮教嘅人，韓林兒父親韓山童用「天下當大亂，彌勒佛下生」嘅預言嚟迷惑民眾，時值元順帝在位，朝綱敗壞、賦稅嚴苛，加上天災不斷，令元末嘅百姓相信天下將亂，更加信奉白蓮教。韓山童自稱係宋徽宗嘅八世孫，理應由佢嚟主宰中原，於是同劉福通組成紅巾軍起義。之後韓山童被誅，韓林兒同母親逃去武安山。

隨住越嚟越多人加入，紅巾軍多次大敗元軍，韓林兒因為父親身份特殊，被劉福通擁立為皇帝，號「小明王」，國號宋，建元龍鳳，情節同張無忌被推舉做明教教主有啲相似。韓林兒在位期間，封咗後嚟嘅明太祖朱元璋做左副元帥，朱元璋軍紀嚴明，又知人善任，唔少人才都走嚟投奔佢麾下。不過，紅巾軍內部經常發生爭執、各自為政，令紅巾軍勢力漸減，劉福通最後戰死，韓林兒就喺去搵朱元璋嘅路上溺斃。

由於韓林兒死得蹊蹺，有人就懷疑係朱元璋落嘅毒手，畢竟講血統，韓林兒繼位先至名正言順，但以朱元璋嘅野心肯定唔甘心屈居人下，又礙於韓林兒嘅身份先唔敢光明正大落手。不過，真相係點，就真係要穿越先知。

圖為《真命天子》同《倚天屠龍記》劇照，原圖嚟自網絡。