知唔知每晚自己瞓著後會發生咩事？晉朝《搜神記》記載，秦代南方有「落頭民」，亦都叫做「蟲落」，佢哋個頭可以飛嚟飛去。話說東吳時期，將軍朱桓有個好特別嘅婢女，佢每晚瞓著之後，個頭就會飛走咗，都咪話唔得人驚。

講返個頭，會用耳仔當翼咁飛，仲識得利用狗窿或天窗出入，通常近天光先返歸。試多幾次，其他人梗係覺得好怪，就去佢間房度睇下搞邊科。成班人搵光一照，見到婢女有身無頭，體溫微冷，氣息尚存。唔知好心定無眼睇，大家就用被冚住婢女身軀，點知搞出個大頭佛。

天光時婢女個頭飛返入屋，點知個身被遮住，試過兩三次都唔得，仲跌埋落地，認真陰功豬。「身首異處」嘅婢女不斷歎息，盡顯憂愁，氣息亦變得急促，好似就嚟賣鹹鴨蛋咁款。成班人見到，就揭開張被，婢女即刻頭身「合體」，隔咗一陣，就無事好似正常人咁，氣息平穩暢順。

朱桓得知，唔驚就假，於是打發佢走，後嚟先發現原來夜晚個頭飛走係落頭民嘅天性。當時南征嘅大將有時都會發現落頭民，有人會用銅盆冚住落頭民嘅頸部，搞到落頭民個頭唔能夠同嘅身「合體」，就一命嗚呼。

圖片嚟自網絡。