粵劇紅伶林家聲4年前今日响家中暈倒，送院後不治，終年82歲。林家聲自細就學習粵劇，11歲就獲當年廣州音樂界「四大天王」之一嘅尹自重欣賞，有機會同大師一齊登台。之後佢又拜「梨園泰斗」薛覺先為師，可以話係集各家之大成。除咗演戲了得，尋求突破、不抱殘守缺、識得與時並進，亦係佢最令人敬佩嘅地方。

林家聲原名林曼純，1933年响香港出生，3歲嘅時候母親病逝，由任職大埔火車站站長嘅爸爸撫養成人。佢爸爸係一位忠實戲迷，當年同戲院職員好熟，成日帶埋仔女去戲院免費睇戲，於是林家聲就培養出對粵劇嘅濃厚興趣。

二戰期間香港淪陷，林家聲爸爸帶埋仔女去廣州避難，認識咗薛覺先嘅舊拍檔肖蘭芳，林家聲10歲嘅時候就拜入佢門下。11歲林家聲初踏台板，獲得尹自重欣賞，而「林家聲」呢個藝名亦係由尹自重改嘅。林家聲16歲嘅時候，機緣際遇下拜入薛覺先門下，並且成為薛覺先最後一位弟子。

林家聲响1962年開始擔正文武生，曾組織多個劇團演出，包括1966年同有「藝術旦后」之稱嘅陳好逑組成「頌新聲劇團」，演出《情俠鬧璇宮》、《碧血寫春秋》、《無情寶劍有情天》等等名劇。而林家聲最鍾意嘅劇目就有《林沖》、《三氣周瑜》同《連城璧》。

喺60、70年代，粵劇受到電視、電影同埋西方文化崛起嘅衝擊，幾乎被淘汰。林家聲獨排眾議，為電視台拍攝粵劇特輯，利用電視向年輕人推廣粵劇。到咗80年代，林家聲喺台上重演多套戲寶，除咗喺劇情編排、場景佈置上革新，仲引入咗激光幻燈、升降舞台等元素，為粵劇注入新動力。

圖為林家聲、陳好逑，取自網絡。