阿史有個疏堂親戚9月先升中四，但老師已經叫佢哋趁暑假得閒去圖書館，借啲教育局建議嘅中國文學名著嚟睇吓。小朋友好乖，真係去借咗魯迅本《呐喊》嚟睇，但就睇到一頭霧水，於是嚟問阿史。其實《呐喊》响今日足足出版咗96年，對文學界影響深遠，亦鼓勵咗當時嘅年輕人擺脫傳統禮教枷鎖。

1923年今日，新潮社出版咗《呐喊》。《呐喊》收錄咗魯迅由1918年至 1922 年嘅15篇小說，包括《狂人日記》、《孔乙已》、《阿Q正傳》、《故鄉》等名篇。不過由1930年開始，魯迅就刪咗最後一篇《不周山》，所以至今絕大部分嘅《呐喊》都只得14篇。

《吶喊》發表嘅時候正值民國初期，雖然清政府已經被推翻，科舉考試亦早就被廢除，但傳統嘅封建禮教依然根深蒂固。魯迅深感國民心靈嘅麻木、思想嘅愚昧，唔係學醫就可以醫得好，於是寫咗一篇又一篇文章，揭露封建制度嘅吃人本質，希望喚醒國民擺脫傳統禮教枷鎖。《呐喊》亦對五四運動有重大影響，佢鼓勵青年勇於摒棄舊禮制、敢於創新。

原圖嚟自網絡。